Fríggjadagin byrjar kappingin um danska meistaraheitið í olympiskri vektlyfting. Í ár verður kappingin hildin í Herning.
Føroyski hópurin, ið er við í ár, er mannaður av Niels Áka Mørk, Pól Hendriki Andreasen, Astu Egilstoft Nielsen og Juliu Jacobsen ið luttekur í sínari fyrstu DM kapping. Skaðar bera tíverri við sær, at Sofus Bech og Leif á Bøgarði, sum báðir eru millum bestu lyftararnir í landinum, ikki eru við hesaferð. Og ein skaði í handliðnum forðar eisini Maibrit Reynheim Petersen í at taka lut. Maibrit vann annars DM-gull í fjør, men vónandi er hon til reiðar, tá DM fyri lið verður hildin í juni mánaði.
Kappingin byrjar fríggjakvøldið Tá verða tað Niels Áki, sum skal kappast í -61kg flokkinum, og Pól Hendrikur, sum skal kappast í -67kg flokkinum, ið skulu lyfta í fyrsta bólki. Teirra bólkur byrjar kl 17:30 føroyska tíð. Báðir hava stórar møguleikar at vinna DM heitið enn einaferð. Niels Áki er núverandi DM vinnari, tó hevur hann tórførari mótstøðu í ár, enn hann hevði í fjør. Pól Hendrikur vann DM í 2021, og er favorittur til at vinna heiðurin í ár.
Leygardagin skal ein føroyingur lyfta. Tað er í -59kg flokkinum, har Asta Egilstoft Nielsen ferð at gera eina roynd at betra um sína plasering í mun til í fjør, tá hon gjørdist nummar 9. Hetta er aðru ferð at Asta er við til DM kappingina. Bólkurin hjá Astu byrjar kl 10:15 føroyska tíð.
Sunnudagin skal Julia Jacobsen á pallin. Hetta er fyrstu ferð, hon er við til DM fyri vaksin. Julia skal kappast í -81kg flokkinum. Hon var í -76kg flokkinum til FM fyri trimun vikum síðani, men nú er hon farin upp ein vektflokk, og vónirnar eru, at hon er við í kappingini um heiðursmerki. Bólkurin hjá Juliu byrjar sunnudagin kl 14:40 føroyska tíð.
Vit ynskja øllum íðkarum góða eydnu til DM kappingina í ár.
Startlistin kann síggjast her:
https://www.weightlifting.dk/2024/04/08/gruppeindeling-og-tidsplan-for-dm-2024/
Leinkja til Livestream:
https://www.twitch.tv/danskvaegtloeftning
| Navn | Vektflokkur | Tíðspunkt (FØ() | Kemur at kappast um |
|---|---|---|---|
| Bólkur 1 | |||
| Niels Áki Mørk Pól Hendrikur Andreasen | -61kg -67kg | Fríggjadag kl 17:30 | Gull heiðursmerki Gull heiðursmerki |
| Bólkur 4 | |||
| Asta Egilstoft Nielsen | -59kg | Leygardag kl 10:15 | Top 6 |
| Bólkur 11 | |||
| Julia Tormansdóttir Jacobsen | -81kg | Sunnudag kl 14:40 | Bronsu heiðursmerki |
| Maibrit Reynheim Petersen Leif á Bøgarði Sofus Bech | Eru ikki við vegna skaða |